Vakante Pos

Ons is op soek na ’n Uitvoerende Direkteur!

Die Afrikaanse Taalraad (ATR) is op soek na ’n Uitvoerende Direkteur wat visionêr en gefokus is op impak. Die geskikte kandidaat moet strategiese bestuur en professionele begeleiding met leierskap kan verbind om die ATR in die volgende fase van groei in te lei.

Die pos behels die bestuur van twee oorhoofse funksies, naamlik dié van die Uitvoerende Direkteur van die ATR en van die Direksie van die ATR. Die grondslag van die pos van die Uitvoerende Direkteur is ’n waardegedrewe, etiese, geloofwaardige en betroubare persoonlikheid.

Onderhoude met geskikte kandidate word so gou moontlik gevoer en ’n aanstelling word tydens die eersvolgende direksievergadering gemaak.

Openbare gesig van ATR
Diplomasie, skakeling en versterking van verhoudings met organisasies en netwerke
Finansiële en operasionele bestuur, Fondswerwing
Skryf van eie artikels, resensies
Doelgerigte bemarking deur media-onderhoude, referate, digitale en sosiale media

Pligte

  • Die openbare gesig en segspersoon van die ATR. Dit vereis uitsonderlike vaardighede in diplomasie om skakeling met diverse gehore te kan fasiliteer.
  • Die handhawing van ’n professionele openbare beeld wat die ATR sal ondersteun om sy doel te bereik.
  • Doeltreffende en effektiewe funksionering van die ATR, wat die strategiese en operasionele bestuur van die werksaamhede van die ATR insluit.
  • Doelgerigte bemarking van die ATR deur middel van referate, media-onderhoude, promosiegeleenthede, digitale en sosiale media, ensomeer.
  • Nakoming van die statutêre verpligtinge van die ATR, waaronder die lewering van jaar- en kwartaalverslae aan onder meer donateurs, asook die opstel van sakelyste vir direksie- en ledevergaderings van die ATR.
  • Realisering van strategiese doelwitte vervat in strategiese beplanning met gebruikmaking van die huidige strategiese plan van die ATR.
  • Finansiële bestuur, waarby ingesluit die opstel van die jaarlikse begrotings vir die ATR, met die klem op fiskale verantwoordbaarheid.
  • Fondswerwing vir die bedryf van die ATR, sowel as die daarstel van diverse inkomstestrome, is ’n kernfokus.
  • Bestuur van menslike hulpbronne om ’n inklusiewe werkplek te vestig, bestuur van infrastruktuur en bemarkingsaktiwiteite.
  • Bestuur van navorsingsverslae en publikasies soos geïdentifiseer volgens die behoeftes van die ATR.
  • Lewering van eie resensies, koerantrubrieke en artikels in hoofstroom- en sosiale media, om die uitbou van die belange van Afrikaans te bevorder.
  • Skakeling en versterking van verhoudings met verskeie verbandhoudende professionele organisasies en netwerke.

Posvereistes

  • ’n Gevorderde nagraadse kwalifikasie (’n doktorsgraad as aanbeveling)
  • Afrikaanssprekend
  • Ervaring in bestuursbeheer van ’n organisasie met meervoudige funksies.

Aanbevelings

  • Nagraadse kwalifikasie in Afrikaans of Afrikaans en Nederlands, Algemene Taalwetenskap, Kommunikasiekunde, met Afrikaans of Afrikaans en Nederlands ten minste tot op derdejaarsvlak
  • Positiewe visie ten opsigte van Afrikaans
  • Bewese bestuursvermoëns en bestuursvaardighede (finansieel, projekbeplanning, kantooradministrasie)
  • Organisasievermoë
  • Goeie kommunikasievermoë (insluitend skryfvaardighede)
  • Goeie kennis van ’n ander Suid-Afrikaanse ampstaal as Afrikaans en Engels.

Diensaanvaardingsdatum:

1 November 2026

Sluitingsdatum vir aansoeke:

15 Augustus 2026

Aansoeke:

Aansoeke met volledige besonderhede, wat ’n CV en die name van twee referente insluit word ingewag en kan aan die ATR-voorsitter, mnr. Daan Potgieter, by daan@aonetwork.co.za, gestuur word. Die aansoek moet ook ’n standpunt van die aansoeker insluit rakende die rol van die ATR in die toekoms.

Daar sal van kandidate verwag word om ’n kort aanbieding oor die eie visie vir die ATR te doen.